محمد طنطاوي يكتب عيش سعيد: الخوف من الالتزام

 

هوه بيحبني آه .. بس مبيحبش الارتباط ..!!

من أسوأ أنواع الأزمات العاطفية هي العلاقات القوية الرومانسية اللي بتنتهي فجأة بدون سبب واضح .. كل حاجة بتقف والموضوع بيتعقد والطرفين واقفين باصين لبعض ومش عارفين يعملوا إيه .. لحد ما بعد شوية بيبدؤوا يفهموا إن اللي حصل هو نوع من أنواع الفوبيا أو الرهاب .. إسمها " فوبيا الالتزام " .. أو " fear of any kind of commitment " .. طبعًا لازم تعرف إن مش كل واحد عايز يلعب بقلب واحدة ويهرب منها بعد ما يزهق أو يستفيد بالقدر الكافي هيبقى عنده فوبيا الإلتزام .. لكن ممكن يكون ببساطة " عيِّل جبان و مستغل " وبيتسلى بخلق الله .. لكن لو كانت رهاب إلتزام .. ففي علامات كتير لوجودها .. منها مثلاً إن الشخص بيكون عنده خوف من الالتزام مع الناس كلها مش بس فى العلاقات العاطفية .. ممكن تأثر على أي قرارات بياخدها فى حياته لأنه مش حابب يكون ملتزم بأي حاجة أو حد .. مشكلته الحقيقية فى إنه يضطر " يلتزم " معاك فى وعد بأي حاجة .. ده طبعًا لا يمنع إن وجودها في علاقة عاطفية هي فعلاً كابوس أي علاقة .. وعشان كده د/ بيريت بروجارد .. أستاذ الفسلفة فى جامعة ميامي .. حاولت تجمع علامات الخطر الأساسية اللي تخليك تتوقع إن الشخص ده عنده " فوبيا الإلتزام " .. وعشان متلاقيش نفسك مزنوق فى كورنر مع شخص مش قادر ياخد قرار بالاستمرار فى العلاقة دي ..!!

1- علاقاتهم العاطفية السابقة غالباً بتكون قصيرة أو متذبذة : بتتكلم عن شخص مقعدش في علاقة فترة طويلة بالرغم إنه كان ناضج كفاية .. وغالبًا مبيكونش عايز يتكلم فى أي نوع من أنواع الارتباطات المستقبلية معاك .. ومكتفي باللحظة اللي إنتوا فيها دي .
2- مبيحبش يلتزم بأي حاجة ولو حتى معاد فى خلال أيام .. زي خروجة أو عزومة مثلاً .
3- بيستخدم كلمات كتير فيها " احتمالية " وهوه بيتكلم معاك .. زي ( احتمال .. يمكن .. ممكن لأ .. أنا هحاول ) .. لو سألته مثلاً هتخلص شغلك وتروح الساعه كام .. مش هيقولك الساعة 5 .. هيقولك إحتمال أروح الساعة 5 ..!!
4- هوه غالبًا شخص نشيط جنسيًا .. لأنه فى النهاية شخص عادي بيحب الحميمية والعلاقات .. لكن .. بدون إلتزام .. وعشان كده هتلاحظ إنه بيفضل العلاقات العابرة .. وأحيانًا حتى الغير شرعية إن كانت هتوفرله الغرض ده .
5- معظم علاقاته غير محددة .. لدرجة إنك غالبًا مش هتعرف في أي لحظة تتكلم معاه عن شكل علاقتكم أو مسماها .. هوه هيفضل إنها تفضل عايمة كده وملهاش مسكة .. باختصار .. لو لقيت نفسك مع حد بقالكم سنين ولحد اللحظة دي مش عارف هوه بيحبك ولا معجب بيك ولا بيقضي معاك وقت لطيف .. فلازم تشك جدًا في فوبيا الالتزام ..!!
6- بيخاف من المشاعر .. بيخاف يعبر عن اللي حاسس بيه .. يمكن كمان بيخاف يكون حاسس بحاجة ناحيتك .. عشان كده هتلاقيه غالبًا مبيحبش يجيب سيرة " الحب " .. لا في كلامه ولا في تصرفاته .
7- هتلاقيه مبيحبش كلمة " صحبي " أو " صحبتي " .. الكلمة اللي بتتقال كتير بين الأصدقاء .. هيكون حريص إنه ميقولهاش عشان متبقاش فيها أي نوع من الالتزامات ناحيتك .
8- معندوش أصحاب مقربين كتير .. ممكن يبقى عنده أصحاب كتير .. وبيقول عليهم " أصحاب " .. لكن مع كده .. مبيبقاش عنده أصحاب مقربين .
9- غير متوقع .. ممكن تلاقيه في يوم لطيف و حبوب و رومانسي .. وفجأة تلاقيه بيتصرف على العكس تمامًا بدون سبب واضح ..!!

التعليقات