محمد طنطاوي يكتب عيش سعيد (3): الانجذاب والرومانسية وأشياء أخرى !!

 

(1)

ليه بنختار حد معيِّن وبننجذب ليه دونًا عن كل الناس حوالينا ..!؟

 

الانجذاب لشخص ممكن جدًا يحصل من أول نظرة .. وبشكل غير متوقع .. وفي أوقات تانية بتكون المرة الأولى محبطة ومخيبة للآمال .. الحقيقة إن البشر عندهم دايمًا رغبة فى التحكم فى حياتهم ورسم توقعات عريضة .. زي ما بتقول جلين جيهير، أستاذة الطب النفسي فى نيويورك، اللي بتأكد إننا بنقدر نعدي أي انجذاب أولي غيرمناسب .. مهما كانت قوته .. وفي نفس الوقت ممكن نختار الشريك الصح حتى لو منجذبناش ليه من أول نظرة .. أيوه .. إحنا بنقدر نتحكم فى النظرة الأولى ونتايجها ..!!

 

د/ مادلين فيوجيري أستاذ علم النفس .. بتقول إن الانجذاب للشكل الجميل هو غالبًا جزء من التطور البشري .. والميديا حاليًا أصلِّت للموضوع ده .. فالشخص المثالي في الإعلانات هو بالضرورة شخص جذاب جسديًا .. بينما فى الواقع إنت محتاج يكون عندك شيء من القبول عشان تكون جذاب لمعظم الناس .. د/ باول إيستويك .. أستاذ علم النفس .. بيقول إن مبدأ الالتقاء بيفترض إن الأشخاص اللي بيتآلفوا بيكون بينهم حد معين من الانجذاب لبعض لأن الأهم من الانجذاب هو " التوافق " .. التوافق بيحدد اختيارك أكتر من الانجذاب للشخص " الأفضل " .. ومبدأ التوافق هو اللى بيخلي الناس غالبًا تنجذب لبعض لأنهم شبه بعض تعليميًا أو عقائديًا أو حتى فى أجسادهم .. بينما الانجذاب للنقيض بيكون من الحالات الأقل حدوثًا .. وغالبًا بتحصل للناس اللى بتعرف بعض كويس فى الأول كأصدقاء عشان يكون بينهم حد مناسب من القبول ببعض .. النتيجة إن دراسات كتير بتقول إننا بنختار الناس اللى بتشبهنا .. سواء بوعي أو لاوعي .. ومعايير التشابه بتكون في المظهر العام .. الطول .. الذكاء .. زي دراسة عملتها جامعة كوينزلاند فى استراليا لقت إن في تشابه بين جينات الطول بين الأزواج في حوالي 24000 زوج و زوجة .. ده غير جينات مسؤولة عن الرغبة فى التعليم .. دراسة تانية نشرها فريق مؤسسة كارولينسكا الطبية السويدية .. لقت إن الأشخاص اللي عندهم اضطرابات نفسية زي الاضطراب ثنائي القطب أو السكيزوفرينيا بيبقوا عرضة أكبر للارتباط بأشخاص عندهم اضطرابات نفسية أخرى .

 

هتلاقي في بعض الأوقات إن فكرة " الانجذاب المتجانس " دي مبتتحققش دايمًا .. زي تجنب كتير من الرجال للسيدات اللي مساويين ليهم " أو طبعًا أكتر منهم " في الذكاء أو النجاح .. في دراسة اتعملت فى كلية وارسو حللت نتايج عن تجارب الارتباط السريع .. طلبوا من العينة اللي تمت عليها التجربة إنهم يقيموا الأشخاص اللي ارتبطوا بيهم بمقياس من 1 – 10 بخصوص المواصفات الجسدية والعقلية .. تحليل الدراسة بيقول إن الرجالة و الستات اختاروا دايمًا الشخص الأفضل فى المواصفات الجسدية والعقلية .. لكن الرجالة تحديدًا كان أقصى رقم كتبوه لمواصفات الست اللي اختاروها عقليًا هو 7 / 10 فقط .. مش أكتر من كده .. بينما الستات اللي أذكى من 7/10 مكانوش ضمن دايرة اهتمام الرجالة .. على عكس الستات .. اللي كل ما كان مقياس الراجل أعلى فى الذكاء كل ما كان ده سبب أهم لإنهم يرتبطوا بيهم .. دراسة أخرى نشرت في مدونة الشخصية وعلم النفس الاجتماعي .. كان معظم الرجالة اللي شاركت فيها بيقولوا إنهم يحبوا يرتبطوا بست ذكية .. حتى لو كانت أذكى منهم .. لكن لما تم اختبار الرجال مع السيدات فى امتحان للرياضيات والستات كانوا أحسن منهم فى الامتحان .. إعجاب الرجالة بالستات دول قل كتير .. أيوه الواقع مختلف عن الكلام ..!!

 

(2)

الرومانسية و كيميا المخ ..!!

 

عالمة الإنسانيات هيلين فيشر .. حاولت تجاوب على سؤال (( في كيميا بينا )) .. عشان تقول إن الموضوع مش معناه مجرد " تفاهم " أو " توافق " .. لكن الموضوع فعلاً مرتبط بالكيمياء كعلم .. عن طريق أربع أنظمة حيوية هرمونية موجودة في أدمغتنا .. الدوبامين / السيروتونين / التيستيستيرون / الاستروجين والاوكسيتوسين .

هيلين عملت دراسة استبيانية عشان تشوف إيه النظام الهرموني الأكثر سيطرة فى كل واحد مننا .. لأن كل نظام هرموني من دول بيؤدي إلى اختيارات معينة .. هيلين عملت اختبارها عن طريق الانترنت على حوالي 14 مليون شخص .. وهو رقم ضخم جدًا .. ده غير دراسة عملية باستخدام الرنين المغناطيسي لتأكيد الدراسة عمليًا .. هيلين لقت إن الاختيارات العاطفية لكل شخص مرتبطة بصفات الهرمون السائد عنده .. يعني الأشخاص اللي عندهم هرمون الدوبامين هو المسيطر .. هم أشخاص فضوليين ومبدعين ومغامرين .. بينما الشخصيات اللي مسيطر عندهم هرمون السيروتونين .. هي شخصيات تقليدية ومنظمة .. أما الأشخاص اللي عندهم هرمون التيستيستيرون هو السائد فهو شخص متشكك ومتشدد ودقيق .. أخيرًا شخصية هرمون الاستروجين هي شخصية راعية ومبدعة ومتسقة مع ذاتها .. وبالتالي .. فكل شخصية انجذبت للشخصية المشابهة ليها .. هيلين بتقول إن كلنا عندنا الأربع أنظمة .. لكن غالبًا بيكون في نظام سائد وهوه اللي بيحدد اختيارتنا العاطفية ..!!

 

(3)

الأمور أعقد مما تبدو عليه في الانجذاب ..!!

 

دراسة الدكتور إيلي فينكل أستاذ علم النفس في إيستويك .. سأل المشاركين فيها عن أكتر الصفات اللي بتهمهم فى شريك حياتهم .. وتم دعوتهم لمقابلات سريعة لتقييم اختياراتهم .. حسب الانجذاب .. روح المرح .. ويا ترى هيحبوا يشوفوا بعض تاني ولا لأ .. والنتيجة .. إن كل الأشخاص كانوا مستعدين لتكرار اللقاء مرة تانية مع الشخص اللي قابلوه وكان شكله حلو .. حتى لو كان مخالف للصفات اللي ذكروها فى البداية .. وعلى غير المتوقع .. ده كان تصرف الرجالة والستات .. د/ فينكل بيقول " الرجالة والستات زي بعض .. كلهم عايزين يكونوا مع شخص مثير وطموح .. بتقول إنك عايز شخص طويل وظريف مثلاً .. صحبك ممكن يقول أنا عايز حد غني وطيب .. لكن في النهاية ممكن تختار حد ميفهوش الصفات دي لمجرد إنه شكله شدك " .

 

أستاذ علم النفس في جامعة نيويورك .. آرثر آرون .. بيقول إن الانجذاب العاطفي هو أعقد بكتير من مجرد استجابة لحد شفته .. لأنك في البداية مبتعرفش عنه أي حاجه غير شكله .. وبتكتشف حاجات تانية بعد كده .. لكن عامة إحنا بنميل إننا نكون علاقة مع الأشخاص اللي بيميلو ناحيتنا .. د/ آرون عمل دراسة غير تقليدية سنة 1997م .. لما طلب من المشاركين في الدراسة إن كل واحد يسأل شريكه في التجربة واللي ميعرفوش بعض 36 سؤال .. واللي كانت متدرجة بشكل يظهر درجة التقارب مع كل سؤال .. د/ آرون حاول يتلاعب بطريقة الأسئلة عشان يساعد الناس إنها تفهم بعض أكتر .. مش عشان يحبوا بعض أو يعجبوا ببعض أكتر .. وبعد نهاية الأسئلة .. معظم المشاركين فى التجربة حسوا فعلاً إنهم أقرب لبعض .. لدرجة إن أحد المشاركين قرروا إنهم يتجوزا فعليًا .. بعد جلسة أسئلة لمدة 45 دقيقة فقط .. عشان كده .. معظم تجارب الرومانسية بتنضج مع مرور .. عشان كده .. معظم الناس متخيلة إنه من المنطقي الدخول في علاقة جنسية مع شخص بتقابله للمرة الأولى وشدك ليه .. بينما مش قادرين يستوعبوا سهولة تكوين علاقة عاطفية من الناس اللي في محيطهم الاجتماعي واللي مكنتوش شايفين بعض جذابين فى البداية .. لكن الانجذاب وارد جدًا يحصل بعد فترة مناسبة تكونوا فيها عرفتوا بعض كويس .. وعشان كده د/ آرون بيقول " سهل جدًا تحب حد تعرفه كويس .. لكن الموضوع مش بنفس السهولة لما تقرر إنك تتعرف على حد عشان عايز تحبه " ..!!

 

(4)

هل ممكن تكون جذاب أكتر ..!؟

 

دراسات كتير بتقول إن في حاجات ممكن تهتم بيها لو حابب إنك تكون جذاب أكتر .. زي :

1- خليك واثق وهادىء : خليك متصالح أكتر مع جسمك .. روح اتعلم الرقص .. إلعب رياضة .. كل ما كنت واثق أكتر من نفسك كل ما هيزيد إحساسك بالأمان وهتبقى جذاب أكتر للناس اللي حواليك .

2- وسع شبكة علاقاتك : أستاذ علم النفس فى جامعة كاليفورنيا ( باول إيستويك ) بيقول إن فرصة إنك تلاقي حد تحبه فى بار أقل كتير مما إنت متصور .. الأفضل إنك تنضم لنشاط أو مجموعة من الناس بشكل يضمن إنك تقابل أشخاص مختلفة وجديدة عندهم نفس اهتماماتك .. واللي عن طريقهم هتقدر توصل للشخص المناسب ليك .. لأن الناس بالفعل بتعمل ده لما تكون بتدور على شغل .. يمكن تشوف ده غريب أو مريب كطريقة للارتباط .. لكن الحقيقة إنها من أكثر الطرق الفعالة ..!!

3- جاوب ال36 سؤال : حمل استبيان ال36 سؤال من الانترنت وشوف الشخص اللي تعتقد إن في بينكم كيميا ما .. وخليه يجاوب الأسئلة دي معاك و شوفوا النتيجة (الاستبيان)

"The Experimental Generation of Interpersonal Closeness: A Procedure and Some Preliminary Findings."

 

http://www.mediafire.com/file/4ic3a5wm9jch3hq/36-questions.pdf

4- بلاش تمثل دايمًا دور التقيل أوي : صحيح إنك مش هتحب تكون " الصيد السهل " .. لكن بلاش برضه تمثل دور " التقيل أوي " .. دي نتيجة دراسة قديمة اتعملت فى جامعة نيويورك .. بتقول إن الطريقة المثالية هي إنك تكون " تقيل " على كل الأشخاص اللي في دايرتك معادا الشخص اللي إنت عايزه .. لازم تكون محتمل .. لأننا أكيد بنحب التحديات .. لكن التحديات اللي نقدر نفوز بيها ..!!

 

التعليقات