شهادات العنف| اغتصب ابنة صديقه عمرها 7 سنوات بعدما تحرش بوالدتها: اعتدى عليها جنسيًا من الخلف ثم قتلها

 
 
بعد فشله في استكمال تحرشه ببائعة الخضار عن طريق مكالمات تليفونية من مجهول استمرت طوال سنتين، تحرش بابنتها التي تبلغ من العمر 7 سنوات، ولكن الطفلة لم تستطع البحوح لوالدتها التي اكتشفت بالصدفة آثار خددوش على جسد ابنتها لتسألها وتكتشف أن صديق زوجها هو من فعل ذلك.
أسرعت الأم بالاتصال بصديق زوجها وتهديده، وطلبت منه الابتعاد عن أسرتها معتقدة أنها استطاعت أن تأخذ حق ابنتها، ولكنها فوجئت بمكالمة من مجهول يقول  "بنتك ماتت ومحدش قلبه هيتحرق عليها غيرك"، لتكتشف أنه خطف ابنتها واغتصبها وقتلها.
 
نص الشهادة:
انا امرأة بسيطة باشتغل بياعة خضار فى حى شعبى كان بييجى لى اتصالات يومية عالموبايل من نمرة معرفهاش .. والنمرة دى فضلت ييجى سنتين تتصل عليا فى وقت متأخر بالليل .. انا كنت فاكرة وقتها ان الست اللى جوزى كان متجوزها قبلى وطلقها هى اللى بتعمل كدة عشان تضايقنى . لحد ما فى يوم كدة فى اواخر شهر رمضان من 3 سنين قبل السحور كنت بابدل هدوم بنتى اللى كانت وقتها عندها 7 سنين لقيت اثار خدوش فى بطنها تحت الصرة على طول .. سألتها الخدوش دى من ايه .. البنت قالت لى ان عمى فلان صاحب بابا هو اللى عمل كدة .. وقتها اتلخبطت وخفت على بنتى .. تانى يوم الصبح الساعة 11 اتصلت عليه وطلبت منه يبعد عنى وعن جوزى وولادى وبصقت عليه فى التليفون  وقفلت الخط بعدها .. وانا فاكرة انى كدة اخدت حق بنتى وطبعا خفت اقول لجوزى ومفكرتش خالص انى اعمل محضر للراجل ده .. واعمل محضر ليه اساسا انا كنت فاكرة وقتها انى خدت حق البنت وانتهينا على كدة .
لكن عرفت بعدها ان ده ما كانش كفاية وانى ما اتصرفتش صح وانه كان لازم اعمل محضر .. انا ست مش متعلمة ومش باعرف اقرأ ولا اكتب وللأسف حسبتها غلط حسب فهمى للموضوع وقتها انى لازم اسكت عشان البت سمعتها ما تبوظش واعرف اجوزها لما تكبر .
 
المهم طبعا ان صاحب جوزى ما سكتش على كدة زى انا ما كنت فاكرة .. لا ده استنى لحد اخر اليوم وقت اذان المغرب والناس مشغولة فى تحضير فطارها .. وانا وقتها كنت سايبة البنت والولد مع والدهم المريض بالسكر وباوزع الخضار على بيوت سكان الحى لإن دى كانت ليلة العيد وانا عاوزة اخد حسابى م الناس قبل العيد .. صاحب جوزى خلانى مشيت من هنا وراح خد البنت بعيد عن ابوها واخوها بحجة انه هيعزمها على نسكافيه باللبن .. واعتدى جنسيا على البنت من الخلف جوة عربية كان بيصلحها وبعدين قتلها .. بنتى اتخنقت بالفوطة اللى المجرم ده كان بيستعملها فى شغله وراح رماها مقتولة بين العربيات القديمة فى المنطقة .. فى الوقت ده انا كنت خلصت توزيع الخضار ورجعت ما لقيتش البنت وفضلت اسأل البنت فين .. ابوها قاللى كانت بتلعب جنبى ومش عارف راحت فين انا كنت بابيع الطلبات للزباين .. فضلت انا والراجل نسأل الناس فى الشارع عنها .. وفى الوقت اللى صاحب جوزى كان بيدور معانا عالبنت .. جانى اتصال تانى من نفس النمرة اللى كانت بتتصل عليا بالليل وسمعت صوت راجل بيقول لى بنتك ماتت ومحدش قلبه هيتحرق عليها غيرك .. فى الوقت ده كنا لقينا بنتى مرمية بين العربيات القديمة .. ولما المباحث جت انا حكيت عالنمرة اللى اتصلت عليا والحلاق اللى فاتح جنبنا قال انه شافها اخر مرة من ساعتين وقت اذان المغرب مع صاحب باباها وكمان كذا حد م الجيران قالوا نفس الكلام ..ولما تم تفتيشه المباحث لقت فى جيبه شريحة تليفون اخدوها واتصلوا عليا منها لقوا انها نفس النمرة اللى اتصلت عليا قبلها وان دى نفس النمرة اللى فضلت تتصل عليا سنتين بحالهم واحنا منعرفش عشان كان بيغير صوته .. وفى المحكمة اتحكم عليه بالسجن المؤبد 25 سنة  فى القضية رقم 61 كلى لسنة 2014.
نشر هذه الشهادة مركز القاهرة للتنمية في 1 ديسمبر 2016 
 
لمشاركتنا شهادات أو تجارب لتوثيقها ونشرها راسلونا على بريد إلكتروني: [email protected]
التعليقات