بين مؤيد ومعارض... آراء فتيات عن تجاربهن مع زواج الأقارب

"اللي نعرفه احسن من اللي منعرفوش" هذه هي دوافع الأهل للقدوم علي زواج الأقارب، وهي من أشهرالجمل التي يتم أستخدامها لأقناع أبنائهن وبناتهن علي هذا الزواج، قلما ما نري أهل لا يفكرون من هذا المنطلق، فيعد زواج الأقارب من أكثر الزيجات شيوعا في مصر،  أستمعت مصريات للفتيات اللاتي تعايشن مع تجربة زواج الأقارب، عن مميزاته وعيوبه وهل من نصائح للفتيات المقبلات علي نفس التجربة.

قالت داليا البالغة من العمر 26 عامًا،"انا متجوزة من ابن خالي ولا اهلي ولا اهله غصبونا طبعا بيبقي في هزار وحاجات كدة، بس عمر ماكان في كلام بجد واجبار، احنا اللي حبينا بعض وقررنا نتجوز ونكمل حياتنا مع بعض، انا بصراحة شايفة مميزاته اكتر من عيوبه بكتير، بتبقي عارفة البني أدم اللي هتتجوزيه عارفه أخلاقه، تربيته كلنا بنسمع عن الرجالة اللي بتبقي في الخطوبة حاجة وبتتحول بعد الجواز، لكن بالنسبة لجواز القرايب، الموضوع بيبقي مختلف، مفيش تصنع مفيش تمثيل كله بيبقي واضح علي الأقل بشكل كبير.

وبالحديث عن العيوب قالت داليا "لو هنتكلم عن العيوب ممكن نقول ان اكتر عيب ان الخصوصية في حياتكم بتبقي قليلة، مشاكلكوا بتتفضح نوعا ما، غير كدة اعتقد مفيش عيوب".

"نصيحتي للبنات أنها متخافش من جواز القرايب، انا من وجهة نظري انه من أفضل أنواع الجواز".

وسردت إسراء البالغة من العمر 27 عامًا عن تجربتها قائلة "جواز القرايب بيبقي قايم علي الشخص اللي معاكي، يعني جواز القرايب مش حلو كدة في العموم، لو الشخص اللي هتتجوزيه كويس ومحترم، بيبقي جواز القرايب ممتاز، لانه بيبقي عارف أهلك بيحبهم وبيحبوه وبيحترمهم، بيعملهم حساب وبيحطهم قدام عينه وهو بيتعامل معاكي، فانا شايفة انه فعلا القريب أحسن من الغريب في الحالة دي".

"العيوب بقي أنه لو حصل أنفصال العيلتين علاقتهم بتتأثر، وبتتوتر وعمرها ما بترجع زي الأول" "وبنصح البنات انها متبقاش عايزة تتجوز من القرايب وبس لا لازم تدقق في اختيارها ولا لازم تكون بتحبه، لان لو حصل انفصال العواقب بتبقي مؤثرة علي العيلة كلها".

"الاقارب عقارب" هذا ما بدأت به مني البالغة من العمر 30 عامًا حديثها عن تجربتها مع زواج الأقارب "انا شايفة ان جواز القرايب ده من افشل انواع الجواز، انا اهلي قعدوا يتحايلوا عليا اتجوز ابن العمي اللي كان عادي بالنسبة لي اوى يعني ولا بحبه ولا حاجة، قولت لنفسي اسمع كلامهم يمكن يكون عندهم حق، وفعلا اتجوزنا، وحصلت بينا مشاكل وكنت عايزة اطلق وهو رافض حبيت ارفع قضية، العيلة كلها وقفت قصادي، عايزة ترفعي قضية علي ابن عمك، وبعد محاولات كتير قرر الباشا انه يطلق اتفاجأ بأيه بقي أنه جايبلي ورقة بتقول فيما معناه أني متنازلة عن كل حاجة، والعيلة اللي فتحت بوقها في وشي لما قولت هرفع قضية حطوا ايديهم علي خدهم ومعرفوش ياخدولي حقي".

"نصيحتي للبنات متتجوزيش حد من قرايب ألا لما تكوني متاكدة مليون في المية، أوعي توافقي عشان خاطر حد، عشان ساعة الجد محدش هيقف جمبك ولا حتي أهلك".

كان لمريم صاحبة ال26 عامًا رأى مختلف ومعارض لمني "انا شايفة ان جواز القرايب مش وحش زى ماالناس بتقول عنه بالعكس، انتي بتبقي بتحبي واحد وتقريبا بتبقي حافظة عيوبه ومميزاته، وده بيسهل حاجات كتير اوى، انا متجوزة ابن خالي ومبسوطة جدا، بالرغم اني مريت بمشاكل كتير قبل الخطوبة لظروف كتير، بس بعد الخطوبة والجواز الدنيا زي الفل، نصيحتي للبنات متفكرش كتير، لو حبيتي قريبك وحسيتي ان هو ده اللي عايزة تكملي حياتك معاه اتجوزيه".

loading...
التعليقات