آية شعراوي تكتب: جبان !

 
 
بما ان القدر شاء اني اشهد علي قصص حب كتيره طول الوقت ارتباط خطوبه جواز ،، شوفت حاجه مشتركه في نهاية معظم العلاقات الولاد بتعملها ومعرفش ايه السبب !!.
ليه الولاد - اغلبهم - بيقرر ينهي العلاقه بغموض لدرجة بتخلي البنت مش مركزه في ان العلاقة انتهت علي ما قد هي نفسها تعرف ليه ؟  ،، علي سبيل المثال وليس الحصر
اكثر ٣ أنواع مٌتكرره للنهايه عند الولاد 
،، تعالوا نستعرضهم كده ،،
اول حاجه الولد اللي بيقرر يبعد من غير سبب -ومش هوضحلك السبب ولو قطعتي شراينك قدامي وحياة امي وابويا ما هقولك السبب  - اه دا بجد في ولاد بتقرر تختفي فجأه او تقول للبنت انها مش عايزه تكمل فجأه بردو 
ليه ؟
كده
كده ازاي ؟!
كده مش هينفع اقول اكتر من كده او مش هينفع اقول اسبابي مش هتفهمي
 ويختفي وسايب وراه واحده هتموت كل يوم ١٠٠ مره مش بس من الفراق لا دا من الحيره كمان ،، اللي هو طيب ليه ؟! طيب ازاي؟! وامتي ؟! انا عملت ايه طيب ؟! وتفقد الثقه في البشر وبيبقي معندهاش احساس بالامان طول الوقت ..
 
تاني نوع الولد اللي بيحب يحسن شكله شويه اللي هو انا هسيبك بس مش بسببك انا اللي وحش انا اللي مستهلكيش انتي تستاهلي انسان احسن مني !
- طيب انا راضيه بيك يا بني بقرفك عادي
- لا لا انا مش هرضهالك تاخدي واحد زيي
 - زيك ايه يا ابني انت مدمن مثلا ولا عندك مرض معديي ولا ايه!
لا بس في حاجات مينفعش تتحكي وهوبا يختفي
ودا ندل جدا لانه ماشي بصورة انه كويس وطيب علشان يخلي نفسه ذكري حلوه وتفضل دماغها تودي وتجيب يا تري كان في ايه طيب عنده مرض ومخبي ؟! طيب هيموت ومش عايزني اتعلق بيه ؟! اه احنا البنات بنبقي ساذجين للاسف مش كلنا بيفهم ان دا اسلوب خلعان مش اكتر بيخلع "بشياكه" علشان متحسبنيش عليه .
نيجي لاسوأ نموذج تالت نوع اللي بينهي العلاقه بطريقة مَرضيه لانه بيقنعك انه بينهي علشان المشكله فيكي العيب فيكي وفي شخصيتك وان انتي يا "فاشله" السبب في ان العلاقه دي تنتهي وان الراجل حاول وعمل اللي عليه بس انتي مفيش منك امل ودا اسوأ نوع لانه مش بس بينهي العلاقه وبيبعد ،، ده وهو ماشي بيجرحك وبيشيلك الذنب والاصعب انه بيهزلك ثقتك في نفسك 
اكيد في بنات بتبقي فعلا هي السبب في نهي العلاقه بس ٩٠٪‏ بيبقي الولد نيته انهاء العلاقه من غير ما يطلع نفسه غلطان ويفهم الطرف التاني ان هو السبب علشان يريح ضميره اللي عمره ما هيرتاح لانه عارف كويس بينه وبين نفسه ايه الحقيقه - حقيقته -
لما كنت بشوف القصص دي واسمع للطرفين واشوف البنات قد ايه منهاره من طريقة النهاية اكتر من الفراق نفسه وجملة "انا معنديش مشكله اننا نبعد بس اعرف ليه علشان ارتاح "
واسمع الطرف التاني الولد ف الاقي اي مبررات واحسهم انهم فعليا مش مقتنعين بكلامهم بس بيحاولوا يصدقوه يمكن ضميرهم يرتاح
لقيت ان في حاجه مشتركه بين ال ٣ انواع ان اللي بيعمل كده شخص "جبان" مش بيعرف يواجهه ولا يقول الحقيقه صريحه واحيانا بيبقي مبرره في ده انه خايف يجرح البنت بالحقيقه ! طيب هو انت كده مجرحتهاش ،، جرح وبس افضل بكتير من جرح وحيره ،، الحيرة بتطول مدة الجرح ومش بتخليه يتداوا بسرعه ،،
البنت الذكيه هي اللي مستوعبه السطر الجاي ده
" الولد اللي يختفي من غير سبب او يقولك سبب مش مقنع او يجبها فيكي شخص جبان هو لو عنده اسباب مقنعه كان قالها في وشك لكن لانه معندوش سبب مقنع وفي الغالب هو حس انه اتسرع او زهق وعايز يغير ويجرب حاجه تانيه او .. او او ف يا بيهرب يا بيتحجج بحجج واهيه"
متقفيش عند سبب الفراق - تعددت الاسباب والموت واحد - الموت للعلاقه مش ليكي لكن انتي اتحركي وكملي حياتك واوعي اي علاقه تهز ثقتك بنفسك .
ومترهقيش نفسك وروحك وقلبك في كلمة ليه لو فكرتي كويس هتعرفي ان ليه مش هتفرق في حاجه وان مش دايما معرفة السبب بتريح يمكن تفتح عليكي باب تعب جديد ،، ومتنسيش ان ساعات الاجابه علي ليه هي انك ببساطه كنتي مع الشخص الغلط .
.. لو تعرف مدي التأثير النفسي - او التدمير النفسي اللي بيحصل للبنت هتتأكد انه من الرجوله انك تقول السبب الحقيقي ومتبقاش جبان مهما كان مؤلم في مليون طريقة يتقال بيها تثبت بيها انك كنت راجل بجد من اول الموضوع لنهايته .
 
*لكل من ترغب في مشاركة الخواطر أو المقالات برجاء التواصل معنا عبر بريد الكتروني: [email protected]
 
التعليقات