رانية زيد تكتب: شم النسيم

 

 

من أجمل المناسبات لقلبي عيد شم النسيم

بطبيعتي لا بحب الأعياد ولا الاحتفالات..لكن العيد دا بحبه كدا لله في لله

واحنا صغيريين مكناش نعرف فيه إلا البريوش وتلوين البيض

كنت أصحى الصبح ألاقي مامتي بتسلق بيض مع قشر بصل عشان اللون الأورانج

وبيض مع كركديه عشان اللون الأحمر..كانت بتهتم أوي إن الألوان تكون طبيعية

وريحة البريوش السخن المرشوش على وشه سكر ماليه البيت

الله الله..

لما اتجوزت لقيت فيه حاجة اسمها فسيخ ورنجة عمري ما كنت سمعت عنهم قبل كدا..ولا دوقتهم..

وبقينا نتجمع العيلة كلها مع بعض لممارسة هواية الفتك بالفسيخ والرنجة..وكان جوزي متكفل بتوفير كميات الفسيخ اللي تكفي العدد دا كله

ايشي فسيخ بالشطة

وفسيخ محشي جزر

وكل ما لذ وطاب من طرق الفسيخ الشهية العجيبة اللذيذة...ومن وقتها راح الجوز وفضل إدمان الفسيخ والرنجة متعة لا تزول.

كل سنة وإنتم طيبيين

 

التعليقات