سمية الكومي تكتب : إسطنبول المدينة التي لا يتوه فيها أحد

من أكتر الحاجات المميزة هنا الطرق والمواصلات، فالطرق ممهدة ومنظمة ونظيفة بالرغم من طبيعة المكان المنحدرة، وهناك أعداد هائلة من الكباري و الأنفاق، فإسطنبول أكثر المدن التركية أزحام، لكن يبقى هناك نظام وقواعد مرورية يحترمها الجميع.

المدينة بها تنوع عظيم في المواصلات (الباص- الترام- المترو- المتروبوس وهو عبارة عن اتوبيس بس له طريق محدد ليه لوحده ومحطات معينة بيقف فيها -والسفن الصغيرة بيقولوا عليها "وابور" وهى وسيلة مواصلات ممكن تنقلك بين الجانب الأوروبي والأسيوي في اسطنبول- وهناك "الدولموش وهو سيارة تشبه الميكروباص عندنا - وأخيرًا التاكسي".

أول خمس أنواع تبع الدولة دول لهم كارت مواصلات يشحن، ومفيش حاجة اسمها تدفع للسواق ولا تقطع تذكرة أنت بتمرر الكارت دا عالشاشة الموجودة في الاتوبيس او في المحطات و هو بيخصم٢ونص ليرة لأي نوع كان هتركبه و لأي مسافة _بس الطلبة و كبار السن و المعلمين ليهم كروت بخصومات اكتر عمومًا الطلبة و كبار السن هنا ليهم مميزات_ إذا حسيت انك ركبت محطتين تلاتة او مسافة قصيرة لاتستحق اللي دفعته (دا كان في المترو بوس و دي المواصلة الوحيدة الشغالة ٢٤ ساعة)بيكون في المحطات كدا ماكينات صغيرة بشاشات بتمرر الكارت عليها وبيرجعلك اللي تستحقه عالكارت بيكون قروش٧٥ولاحاجة، في أي وسيلة بيكون في شاشة مكتوب عليها اسماء المحطات واسم المحطة اللي انت فيها و المحطة الجاية مع تسجيل صوت بينبهك أنت دلوقتي فين و الجاية إيه يعني مستحيل تتوه تقريبًا.

دا غير إن البلدية اللي هي المحافظة يعني عاملة ابلكيشن للمواصلات بتكتب المكان اللي عاوز تروحه و بيطلع لك المواصلات و أرقام الأتوبيسات الرايحة هناك وتقدر تدخل رقم الأتوبيس اللي أنت منتظره و تتابع رحلته هو دلوقت فين قدامه وقت قد ايه ويجيلك وبيكون دقيق فعلًا، في زرار كدا لو أنت عاوز تعدي الطريق والإشارة لسة مش مقفولة بتدوس عليه و بيعجل من قفل الإشارة و دا معمول اصلًا للعاجزين والمكفوفين.

كل الناس هنا بتركب المواصلات العامة قليل حتى اللي بيركب دولموش مع أنه نفس الأجرة، أما التاكسي ففي الطوارئ او بعد ١٢عشان المواصلات بتتوقف لأنك بمصاريف أكلك شهر ممكن تدفعه في مشوار تاكسي نص ساعة !.

في كمان ملحوظة مهمة في حارة مخصصة لعربيات الإسعاف و بس في كل الطرق. 

التعليقات