هند السلمي تكتب: محتاجة لك

 

 

"أنا محتاجة لك " مفتاح مغارة قلب الراجل، وتميمة السحر اللي بتحول الأوامر السخيفة منك لطلبات حلوة ولطيفة ودمها خفيف على قلبه.

على فكرة مش عيب إنك تعبري عن إحتياجك له ولا حينقص من كرامتنا، أنا محتاجة لك أقعد معاك، محتاجة أخرج معاك، محتاجة لك تمسك أيدي، محتاجة لك تسمع الحكاية العبيطة اللي حصلت لي النهاردة، محتاجة لك تطبطب عليا.

محتاجة لك تروح معايا للدكتو، محتاجة لك ( أي حاجة) انتي محتاجاها، متتجاهليش احتياجك لشريك روحك في سبيل حسابات العقل و الكرامة وهو لو كان بيهتم كان عرف احتياجي لوحده، لا يا عزيزتي كرريها ورايا ٣ مرات لحد ما تحفظيها ( الرجالة ..... مش .... بتعرف .... لوحدها )، والله ما بتعرف لوحدها.

 ببساطة مش معاهم البلورة المسحورة بتاعة احتياجاتنا المعقدة على المستوى النفسي والإنساني( وأنا اقسم لك أني ضيعت وقت طويل من عمري وأنا مؤمنة بعكس ذلك لحد ما اكتشفت خطأ نظريتي من أساسها )، لازم تقولي احتياجك و تفسريه بهدوء وتعبري عنه بمنتهى الوضوح.

مثلا (أنا محتاجة افضفض لك عن حاجة جوايا بس وانت حاضني ومن غير ما تدور لي على حل او تلوم او تسأل انا بس محتاجة أتكلم )، الاحتياج مش ضعف، ده غريزة إنسانية مفطورين عليها، وقوتك الحقيقة هي أنك تعرفي تعبري عن نفسك بشكل شامل، رغباتك، أمالك، أهدافك، مواطن ضعفك ونقاط قوتك.

الراجل في داخل تكوينه بيحس بالانتماء للست اللي بتحتاج ليه بشكل أو آخر (الرجل السوي طبعا ) وبيبقى عنده نزعة شهامة مختلطة بفطرة ذكورية كده انه يلبي احتاجاتك دي ( لو عبرتي عنها بالشكل الصحيح )، مثلا بدال ما تقولي له : تعالى ساعدني بدال ما انت قاعد بتتفرج على التليفزيون كده زي قلتك .

قولي له : محتاجة جدا تكون جانبي بس مش فاضية اجي اقعد جانبك، كده يعني، عبري يا عزيزتي، عبري وخرجي اللي جواكي، وخدي كل اللي انتي محتاجة له، واملي الدنيا من حواليكي كلام حلو وتصرفات أحلى، بالمناسبة تأثير كلمة انا محتاجة لك عند الراجل زي كلمة انتي احلويتي عند الست

التعليقات