تسنيم عادل تكتب: شازلونج (الجزء الخامس)

 

منزل حنين و آدم

 

شيرين: حمدالله على سلامتك يا حبيبتى كده تخضى ماما ده انا روحى كانت هتروح

 

حنين: بعد الشر عنك يا ماما ربنا يخليكى ليا تعبتك بجد معايا

 

شيرين: تعبك راحة يا حبيبتى

 

رأفت : بأقولك ايه يا حنين من هنا ورايح تهتمى بصحتك مينفعش الكلام ده اللى حصل ده ممكن يتكرر تانى فى أى وقت لو فضلتى كده ولا أكل ولا شرب عدل و كمان حرقة دم لازم تهتمى بنفسك و بصحتك علشان ديه اللى بقيالك يا بنتى احنا مش باقيين

 

حنين : بعد الشر عنكم ربنا ميحرمنيش منكم أنا من غيركم ولا حاجة

 

رأفت : خلاص أوعدينى لو احنا غاليين عندك انك تهتمى بنفسك و متحرقيش قلبنا عليكى تانى يا بنتى ده انتى اللى هتشيلينا

 

حنين : انا اشيلكم فى عنيا يا بابا

 

سارة : يا سلام من لقى الدلع و ميتدلعش يبقى حرام عليه يلاا خديلك يومين دلع يا حنين

 

حنين: انا عارفة انى تعبتك انتى كمان معايا

 

 سارة : بطلى هبل يا بنتى ده انتى اختى مش بس صاحبتى و عشرة عمرى

 

ايه ده الباب بيخبط وايه الاصوات ديه كلها هأروح افتح الباب

 

 

صوت زغاريد

 

الحاجة عواطف : تزغرد ... حمدالله على  السلامة يا حبيبى نورت بيتك

 

خش بيتك و خطى عتبتك

 

حنين بصوت منخفض و ابتسامة خفيفة تحاول تداريها : آدم ... اخيرا

 

شيرين :  كفارة يا جوز بنتى

 

رأفت : فى ايه يا شيرين ... حمدالله على السلامة يا آدم ربنا ما يعودها أيام

 

اتفضلوا اتفضلوا ... اتفضلى يا حاجة عواطف اتفضل استريح يا حاج أمين

 

الحاج أمين : يزيد فضلك يا دكتور رأفت

 

سارة : حمدالله على السلامة يا آدم نورت بيتك ربنا ميحرمكش من بيتك ولا يحرمك من حنين و لا يحرمها منك

 

آدم : شكرا يا سارة

 

 

 

الحاجة عواطف : ايه يا حنين ايه يا حبيبتى مش سامعينلك صوت يعنى من ساعة ماوصلنا ايه مخصمانا ولا رجوع جوزك مش جاى على هواكى

 

الا ما بليتى ريقه حتى بكلمة حمدالله على السلامة

 

سارة : ايه يا طنط عواطف بس ... انتى عارفة ان حنين لسه  تعبانة ... ديه وقعت من طولها أول ما سمعت خبر القبض على آدم

 

 

آدم : ايه ... ايه اللى حصل انتى كويسة يا حنين

 

حنين : كويسة

 

 

الحاجة عواطف : فى ثانية يا أهبل نخيت

 

اعملك منظر و اتقل ...

 

ده اللى اقدرك عليه ربنا يا مرات ابنى

 

سارة : فى ايه يا طنط ده انتى حتى عارفة حنين بتحب آدم ازاى

 

ما تنطقى يا حنين احنا عارفين انك مجهدة يا حبيبتى و الأيام اللى فاتت كانت كلها صعبة  عليكى بس ده ميمنعش انك تحاولى تخرجى بقى من الموود ده

 

 

حنين : حمدالله على السلامة

 

 

آدم : الله يسلمك ... مالك بتقوليها من غير نفس

 

حنين : عادى و النفس هتيجى منين يعنى

 

آدم : خلاص يا ستى أرجع تانى

 

حنين : لأ بعد الشر عنك ... ده أنا كنت هأموت

 

آدم : بعد الشر

 

رأفت : أهو يا ولاد الأوقات الصعبة ديه بتمر عليكم علشان تفتكروا قيمة بعض و تعرفوا ازاى انتم غاليين عند بعض

 

استهدوا بالله كده بقى و اتصافوا

 

الحاج أمين : هو ده كلام الناس العاقليين الله يفتح عليك يا دكتور  لعله خير ربنا رايد يفكركم انكم نعم فى حياة بعض ياولاد وانكم متامنوش لوجودكم فى حياة بعض من غير ما تحافظوا على بعض فى ثانية ممكن تقصيركم يحرمكم من بعض و ساعتها هتندموا و اظن الكام يوم اللى فاتوا أكيد انتم جربتوا و عرفتوا يعنى ايه كل واحد فيكم يكون فى ناحية

 

الحاجة عواطف : والنبى يا ولاد انتم محسودين ... ولا حد ناقركم و عملكم عمل أكيد علشان يخرب حياتكم اتجدعنوا كده وورونا بقى شطارتكم و هاتولنا عيل نفرح بيه و يقربكم أكتر من بعض

 

شيرين : حسد ايه و عيل ايه وعمل ايه ... يا حاجة عواطف الحل انهم يقعدوا يناقشوا بعض فى اللى مضايقهم و يواجهوه و يحلوه مش يهربوا منه

 

الحاجة عواطف : لأ انتى مش فاهمة انتى مبتفهميش فى الحاجات ديه متأخزنيش بقى يا شيرين انا فاهمة ده مش ابنى ده حاله اتبدل

 

 

شيرين : قصدك ايه ان بنتى بدلت حاله

 

الحاجة عواطف : لأ قصدى ان حالها هى كمان مبدول وهما نافرين من بعض يبقى ازاى هيقعدوا يتناقشوا لما هما اصلا على طول بيتناقروا

 

شيرين : بيتناقروا ...! يا حاجة عواطف كل ديه خرافات و الحقايق اللى فيها نسبة قليلة جدا فمينمفعش نعلق على الحاجات ديه شماعة فشلنا

 

احنا لينا دور مع الأولاد ... ولازم نساعدهم ياخدوا بايد بعض من تانى

 

الحاجة عواطف : ايدى على كتفك

 

الحاج آمين : عين العقل

 

ساكتين بقى ليه يا ولاد ما تتكلموا انتم بتتفرجوا علينا

 

ايه اللى فيكم

 

سارة : طيب استأذن بقى و أمشى أنا و أسيبكم تاخدوا راحتكم و الحمدلله انك رجعت بيتك يا آدم بالسلامة

 

حنين : لأ استنى معايا انتى مش غريبة و بعدين انتى عارفة و شاهدة و عايشة معايا كل التفاصيل

 

سارة : لأ كده أحسن ... و برضه هتلاقينى جنبك يا حبيبتى فى أى وقت

 

آجى ازوركم المرة الجاية علشان نحتفل ببدايتكم الجديدة سلام يا جماعة

 

 

 

آدم : أهو مثلا أهو سارة قالت هتمشى علشان تسيبنا براحتنا وهى تقولها استنى اتفرجوا

 

على طول مدخلاها فى حياتنا

 

حنين : يا سلام ... ده على أساس ان سميح ميعرفش عننا حاجة هو كمان ولا بتشتكيله

 

ولا على أساس إن باقى أصحابك مش بيتجمعوا حواليك ويسمعوا مأساتك مع مراتك الظالمة المفترية اللى مطفشاك على طول من البيت

 

 

آدم : هنبتدى بقى ده شكل واحدة عايزة تتفاهم

 

 

حنين : ما انت اللى بتستفزنى ... ورينى كده انت هتتفاهم ازاى فرجنى

 

رأفت : و بعدين يا ولاد مش أسلوب كده

 

الحاج أمين : استهدوا بالله متدخلوش الشيطان بينكم

 

الحاجة عواطف : والنبى محسودين و معملكم عمل اسمعوا كلامى بقى

 

شيرين : خلاص كل واحد قال اللى عنده ... انتم محتاجين مساعدة يا ولاد محتاجين حد غيرنا فاهم وواعى و يقدر يقرب المسافات من تانى بينكم ايه رأيكم تروحوا لدكتور متخصص فى العلاقات الأسرية و الزوجية وتستشيروه

 

 

 

الحاجة عواطف : ايه ! دكتور نفسانى أنا ابنى مش مجنون

 

شيرين : جنان ايه بس ما تتكلم يا رأفت انت دكتور وفاهم و عارف فهم الحاجة عواطف

 

رأفت : يا حاجة ده زيه زى أى طبيب و بيعالج النفس و الروح زيه زي أى مرض ولا جنان و لا غيره و بعدين هو هيقوم بدور المصلح بينهم أحسن مننا

 

ولا ايه رأيك يا حج أمين

 

الحاج أمين : والله كلام مش بطال ... ايه رأيكم يا ولاد

 

حنين : معنديش مانع ... لو ده هيحسن علاقتنا و هيرجعنا قريبين تانى من بعض فيبقى أنا موافقة

 

آدم: و أنا على الرغم من انى مش مقتنع و مش مآمن بان الدكاترة النفسيين ممكن يعرفوا يساعدونا بس أنا موافق علشان خاطرك بس و علشان خاطر الكلمتين الحلوين اللى انتى قولتيهم مش انتى يعنى لوحدك اللى عايزة نرجع قريبيين أنا كمان عايز

رأفت: خلاص سيبولى أنا الموضوع ده أنا هأوضبلكم كل حاجة ... كله له حل عند الدكتور حاوى

 

الجميع فى صوت واحد : حاوى !

التعليقات