نادين بدراوي تكتب: إزاي تعرف الحنية؟

 

إزاي تعرف الحنية

من الود المسموم؟

إزاي تتصدر لقضية

وإنت عليل محموم؟

إزاي تعرف إنك مغروم؟

وإن روحك لسالك؟

مش يمكن مهزوم

وبيتهيألك؟

ما يجوزش لقلبك يستغني

وهو عمره ما كان شبعان

إزاي عالشوق حيستني

وهو عمره ما داق غير حرمان؟

إزاي ترتاح

وإنت عمال تقاوم؟

ما يجوزش ينتظر منك سماح

وانت لسة بتتوجع حتي وإنت نايم

إزاي تعرف الحنية

ومفيش منها كتير؟

ومين حيشيل مسئولية

كل اللي فات من تقصير؟

إزاي تعرف إن الأمان كفاية

و هو بيدوب بين ايديك؟

إزاي تكشف النوايا

و إنت شايف بغير عينيك؟

إزاي تكتم الحنية

من غير ما تتسرب؟

إزاي تلمس الحنية

من غير ما تقرب؟

إزاي تسكن الحنية

وإنت رحال ومتغرب؟

إزاي تعرف الحنية

ووجعها متجرب؟

 

التعليقات