آية شعراوي تكتب: أنا محسودة

 
قررت اكتب عن 3 أنواع للحسد بشوفهم "يضحكوا" بالنسبالي أو ممكن يعتبرهم غيري "مستفزين" اكتر ما هما مضحكين
النوع الاول :
النوع دا محدش يعرف عنه حاجة ولا بيقول عن حياته حاجة وتلاقيه مقتنع أن اي حاجة بتبوظ في حياته حسد ! وأن الكون متأمر ضده علشان يحسده في حين ان الكون اصلا ميعرفش عنه حاجة قافل حياته بسرية تامة بس محسود إزاي مش فاهمة
يعني مثلا
- شوفتي يا بنتي العريس اللي كان جايلي الموضوع اتفركش العين بجد فظيعة والناس مبترحمش
- انتي كنتي قايلة لحد اصلا انك جايلك عريس ؟!
- لا هو بابا وماما بس .
طيب لما هو ماما وبابا بس ناس مين اللي هتحسدك وهي متعرفش اصلا اكيد يا بابا يا ماما يا البواب معروفة يعنى .
ولا تلاقى واحد بعد ما جاله فرصة  شغل كويسه ومجبش سيره لحد حتى اهله الموضوع يبوظ يقولك عين !
طيب انتو بتيجو بعد الحوار ما حصل وخلص وتقوله عين على اساس ايه بقى !!
فـ ده نوع في الغالب بيبقي متغاظ انه كتم على حاجته ومحصلتش فهنلزقها في الحسد بردو .
النوع التانى :
ودا مستفز اكتر من انه كوميدي انا مسمياه "معندكش شمعة تداريها ولا حاجة تتحسد عليها" .. ودول بقي اللى هما بيبقوا ناس عاديين او ممكن نقول حياتهم اقل من العادي بس دايما عندهم اقتناع انهم محسودين ..
طيب انت عندك حاجه تتحسد عليها
لا بس محسودين بردو ..
طيب خاليك منطقى علشان انا كمستمع اصدق انك اتحسدت !! فين الشمعة اللي هتداري عليها اصلا !!
دول بيبقي في الغالب نقص حسين انهم قليلين فـ بيقنعوا نفسهم انهم عندهم حاجات زياده لأ وكمان بيتحسدوا عليها .
نيجي بقي للنوع التالت وهو
النوع اللى بيتباهى بلى عنده ويتمنظر على خلق الله ويرجع يقولك اتحسدت .. طيب انت بتتباهى ليه لما انت نجمك خفيف يا معلم .. يعنى انت تتمنظر وترجع تزعل !
دا غير ان دينيا حرام " إِنَّ اللَّهَ لَا يُحِبُّ الْفَرِحِينَ "  " وَلاَ تَمْشِ فِي الأَرْضِ مَرَحًا إِنَّكَ لَن تَخْرِقَ الأَرْضَ وَلَن تَبْلُغَ الْجِبَالَ طُولاً" صدق الله العظيم .. متفرحش خاليك معتدل التباهى مرض ربنا يبعدنا عنه .
. طيب مش هنظر ونتكلم في الدين اجتماعيا انت بتجرح غيرك اللى مش عنده النعم دى وبتأذيه نفسيا وترجع تضايق انه حسدك .. ما انت اللى استفذيته يا جدع !
الحسد موجود ومذكور في القران وكتر اووى مؤخرا وللاسف الناس بقيت  تحسد بعضها على حاجات بسيطة وممكن عادية وطبيعية انا مع كل ده 
ونخاف علي نفسنا وكل حاجة
 .انا بس ضد ال 3 أنواع اللى فوق دول واكيد كلنا قبلناهم في حياتنا كتير
التعليقات