محمد طنطاوي يكتب عيش سعيد: الشوكولاتة.. غذاء الروح والعقل والحياة ..!!

 

لما بدأنا نعرف إزاي ممكن نستخلص السحر من نبات الكاكاو .. قدرنا نوصل لأحد أهم وألذ الحاجات اللي أكلناها وهنفضل ناكلها على مر التاريخ كله .. الشوكولاتة.. المنتج اللي محلي حياتنا كحلويات .. هو كمان محليها كعنصر بيدخل فى صناعة الدوا لمدة 3000 سنة .. عالج فيها الإرهاق والروماتيزم والزهري .. متخيل الكاكاو بيعمل إيه .. ده غير الدراسات اللي ربطته بالعقليات اللي عندها وعي أكبر واستهلاكها للشوكولاتة أكبر .. زي دراسة عن العلاقة الإيجابية بين استهلاك الشوكولاتة والفائزين بجايزة نوبل .. وأمثلة كتير عن دراسات الملاحظة اللي اتعملت على مستهلكي الشوكولاتة.. زي ما بتقول د/ إيميلي دينز .. الطبيبة النفسية .. اللي أكدت إن دراسات تانية ربطت بين زيادة الاكتئاب وزيادة نسبة استهلاك الشوكولاتة في الشهر .. وكأن المكتئب بيعالج نفسه بيها .. طبعًا الدراسات دي مش دقيقة كفاية عشان تشرحلك اللي بيحصل .. يعني هل الشوكلاته بتسبب الاكتئاب ولا بتعالجه .. هل الكافيين بيخليك أذكى .. ولا الدول اللي بتستهلك شوكولاتة أكتر عندها علماء أكتر فازوا بجايزة نوبل ..!؟

طبعًا خلينا متفقين إن نوع الشوكولاتة بيفرق .. لأن الكافيين والفلافانولز المفيدة موجودة فى الكاكاو نفسه .. ف الشوكولاتة البيضا مثلاً مفيهاش كاكاو .. وكل ما كانت الشوكولاتة فيها سكر ولبن أكتر كل ما كانت أقل فى المواد المفيدة عكس الشوكولاتة الغامقة " الدارك " .. عشان كده معظم الشوكولاتات التجارية الموجودة فى السوق مش مفيدة .. لأن كمان فيها دهون متحولة .. لما اتعملت دراسات على استلاك الكاكاو بشكل علمي .. قدرنا نفهم بشكل أكتر تأثير الكاكاو على الجسم .. أولاً .. الفلافانولز الموجودة فى الكاكاو ( زي ما موجودة فى القهوة والشاي والتوت ) هي من مضادات الاكتئاب لأنها بتنشط المستقبلات المضادة للتوتر .. زي ما الفلافانولز كمان ليها تأثير " مضاد للإلتهابات " .. بيشتغل على كل الجسم .. زي ما بتقلل ضغط الدم .. وبتزود الدم الواصل للمخ .. وبتحسن من وظائف الشرايين والأوردة .. دي كمان بتحسن نشاط الخلايا العصبية وبالتالي بتقوي الذاكرة .. لدرجة إن في دراسة اتعملت .. استخدموا فيها الكاكاو بتركيز عالي مع منتج تاني شبيه لكن مفيهوش كاكاو ( تأثير بلاسيبو ) .. وكانت النتيجة إن مستهلكي الكاكاو مودهم اتحسن جدًا فى خلال كورس ال30 يوم بتوع التجربة .. وزي ما بيقول د/ جو فينسون .. أستاذ الكيمياء فى جامعه سكرانتون .. ف الكاكاو هو أكتر مصدر مؤثر للبوليفينولز .. اللي داخل فى تكوين حوالي 4000 نوع من مضادات الأكسدة ..!!

طيب .. إحنا ليه بندمن الشوكولاتة..!؟
د/ آمي ستافينزر .. أستاذة علم النفسي والأعصاب .. درست فكرة ( إدمان الشوكولاتة) بشكل علمي .. وبتقول إننا بندمن الشوكلاته لأن طعمها حلو .. وريحتها حلوة .. وشكلها حلو .. إحساس أكلها ودوبانها في بؤك حلو .. وعشان كده .. في كل مرة بناكل شوكلاته .. المخ بيطلع مادة الدوبامين .. المسؤولة عن إحساس الرضا والسعادة .. زي ما بيحصل وقت ممارسة الجنس .. الضحك .. تتفرج على فريقك الرياضى وهوه بيفوز .. ومع كده بتفضل فكرة إفراز الدوبامين مرتبطة بتجاربنا الشخصية وملوش دعوة بالشوكولاتة كمادة أو مكوِّن .. ومفهومنا عن السعادة .. وده طبعًا تفسير وجود ناس مبتحبش الشوكولاتة على وجه الأرض .. لأنهم مقدروش يحبوا التجربة نفسها .. والشوكولاتة مقدرتش تخليهم فرحانين .. اللطيف إن كان في معتقد قديم بإن الشوكلاته فيها مواد كيميائية بتنشط إفراز الدوبامين .. زي السجاير والكوكايين .. لكن الحقيقة إن الشوكلاته مفيهاش مواد زي كده .. لكن الموضوع في التجربة نفسها أكتر منها المكونات .. د/ ستافينزر وفريقها حاولوا يدرسوا الموضوع بشكل مكثف عشان يوصلوا للمادة اللي ممكن تكون مسؤولة عن إدمان الشوكولاتة.. التجربة كانت تمت على مدمني شوكولاتة.. في الوقت اللي عندهم فيه ( رغبة / نهم ) شديد للشوكلاته .. يعني هيموت وياكل شوكولاتة حالاً .. وبدأت ببار من شوكولاتة (هيرشي) اللي فيها كاكاو وسكر ودهون وطبعاً بيتم فيها الاستمتاع بالشوكولاتة كشكل وريحة وطعم ومذاق في الفم .. وإدولهم كبسولات فيها بودرة الكاكاو قد اللي في الشوكولاتة بالضبط .. وكمان بار شوكلاتة بيضا ( فيها كل حاجة ما عدا الكاكاو ) .. وبعد كده طلب من كل واحد منهم تقييم مذاق الشوكلاته .. سواء بار الشوكلاته العادية / البيضا / البودرة لوحدها .. والتقييم تم بعد 90 دقيقة من الأكل .. وهو الوقت اللازم عشان الكافيين ومادة الثيوبرومين الموجودة فى الكاكاو تتحول لصورة نشطة بيولوجيًا وتأثر فى الجسم .. النتيجة كانت كالتالي .. بار الشوكولاتة الهيرشي .. قلل نسبة النهم للشوكولاتة بنسبة 61% (نسبة رضى الشخص عن الشوكولاتة اللي أكلها) .. الشوكولاتة البيضا قللت النهم بنسبة 42% .. كبسولات الكاكاو قللتها بنسبة 16% .. يمكن ده يخلينا نفهم إن الرغبة فى الشوكولاتة مش مرتبطة بالكاكاو نفسه قد ما هيه مرتبطة بجميع المكونات ( مكونات بار الشوكولاتة نفسه + طعم ومذاق الشوكولاتة ودوبانها فى الفم ) ..!!

طيب .. إيه دور الشوكولاتة برضه .. بتسعدنا إزاي ..!؟
د/ستافينزر بتقول .. عشان نفهم ده لازم نفهم دور الدوبامين .. الدوبامين بيساعدنا نفتكر التجارب الإيجابية .. الدوبامين بيدينا طاقة دفع لما تمشي جنب مكان بتحبه .. أو تشم أو حتى تتخيل حاجة بتحبها .. وعشان كده لما بناكللشوكولاتة بنستمتع بيها .. وعشان كده كل مرة بتاكلها بيزيد تفاعل الدوبامين معاها .. وبالتالي بيتغير تصرفاتك ناحية الشوكولاتة.. بتحبها أكتر وبتحتاجها أكتر .. خصوصًا إن الشوكولاتة فى حياتنا هي تجربة إيجابية .. بناكلها في المناسبات السعيدة .. مع العيلة .. في الحفلات .. وحتى الإعلانات بتقول إنها حاجة حلوة ..!!

طيب هل النهم والرغبة في الشوكولاتة طول الوقت دي ليها علاج .. خصوصًا لو كنا بنستهلك كميات أكتر من اللازم وبنضر نفسنا .. د/ستافينزر بتقول إن النهم للشوكولاتة زي أي أكل .. محتاج إنك تفكر وتاخد من وقتك ثواني قبل ما تقرر هتاكل إيه .. تشيل من دماغك كل الضغوط أو الحاجات اللي شاغله بالك وإنت بتفكر في الأكل .. عشان متستسهلش وتختار الحاجة اللي بتحبها " كنوع من أنواع التنفيس عن نفسك " و تكون مضرة ليك فى النهاية .. خصوصًا لما تفهم كويس إن الشوكولاتة حلوة لكنها مش هتحللك مشاكل مع حبيبك أو شغلك أو حياتك عامة ..!!

أخيرًا .. في استقصاء لطيف عملته شركة كادبوري.. على السيدات فى المملكة المتحدة "بريطانيا" .. عشان يشوفوا مين أفضل بالنسبة لهم .. تاكل بار شوكولاتة.. ولا تقضي ليلة في علاقة جنسية مع راجل .. والحقيقة إن الخبر غير السعيد للرجالة فى بريطانيا .. إن أكتر من 52% من السيدات اختاروا الشوكولاتة.. الدراسة اللي تمت على 1524 سيدة .. كانت نتيجتها إن 66% منهم قالوا إن الشوكولاتة بتغير مودهم جدًا .. لدرجة إن السيدات من سن 18 – 24 سنة قالوا إنهم يعتقدوا إن الشوكولاتة زي أدوية تحسيين الموود "الحالة المزاجية" من حيث تأثيرها عليهم .. طبعًا زي ما قلنا 52% اختاروا الشوكولاتة عن الجنس .. لدرجة إن سيدة منهم قالت ( الشوكولاتة بتوفرلي متعة مضمونة ) ..!!

 
 

 

التعليقات