محمد صباغ يكتب عن الريجيم وإنقاص الوزن: بناكل إيه؟

 
محمد صباغ يكتب عن الريجيم وإنقاص الوزن: بناكل ايه؟
 
طب تعالوا نتكلم في البديهيات انهاردة. 
إحنا بناكل إيه؟ 
كل الطعام اللي بتاكله ببساطة بيتكون من عناصر غذائية كبيرة macronutrient. و عناصر غذائية صغيرة micronutrients. 
يعني حاجات كبيرة زي الكربوهيدرات، الدهون و البروتين. 
وحاجات صغيرة زي المعادن والفيتامينات.
 
التقسيمة دي ( زي ما أنا فاهم) راجعة للكمية اللي الجسم بيحتاجها من العناصر دي علشان يقوم بوظائفه ، مثلاً احنا بنستهلك الفيتامينات والمعادن بكمية اقل من 1جم علشان كدة قلنا عليها micro بينما استهلاكنا من البروتين في المتوسط 80 جم في اليوم. فيبقى البروتين macro
 
المفروض ان طبق الفول، صنية البطاطس أو الفرخة المشوية تحتوي علي بعض من المكونات دي و المفروض ان أنت كفرد لك نسبة معينة من الحاجات دي اللي بتاكلها كل يوم علشان تمد الجسم بالطاقة ويكون قادر للقيام بوظائفه الحيوية. 
نقص أحد المكونات دي ممكن يسبب ضرر ولكن الضرر والنقص بيختلف علي حسب أهمية العنصر و نسبته.
 
تمام ، ايه هو بقي الغذاء الصحي healthy foods
 
أغلب التعريفات بتصب في إنه الطعام اللي انتجته الطبيعة و بيحتوي علي العناصر الغذائية الأساسية اللي وضحناها فوق دي، بدون ادخال أي مواد مصنعة عليه.
 
الغذاء الصحي بيمدك بالطاقة، بيقلل حدوث بعض الأمراض ولكن ملهوش علاقة بفقدان الوزن أو زيادته، بمعني لو أكلت أكل صحي أكتر من معدل الحرق بتاعك وزنك حيزيد ولو أكلت أقل وزنك حيقل.
 
طيب ممتاز، كدة فيه كربوهيدرات صحية و فيه كربوهيدرات ضارة؟
 
أيوة كل طعام مستخرج من الطبيعة يحتوي علي السكر داخله يعتبر طعام صحي و كل ما تم تصنيعه واضافة عليه سكر او تعديله يعتبر غير صحي و كذلك الحال في الدهون واللحوم. 
بمعني الفاكهة، الخضروات الطازة، الحبوب الكاملة كلها اطعمة صحية، عكس الدقيق الأبيض، السكر، الكيك، العصائر واي شيء مصنع بالسكر. 
الدهون زي اللي موجودة في اللحوم الحمراء، الأسماك، الزبدة، منتجات الألبان و الجبن دهون صحية، بينما السمن النباتي، الزيوت المهدرجة وأغلب الزيوت النباتية ( عدا الزيتون، جوز الهند) زيتوت ضارة. 
كذلك اللحوم، اللي اكلت من عشب الأرض و ماتمش تسمينها ولا اعطائها مضادات حيوية لحوم صحية بينما اللحوم المصنعة زي اللانشون، البلوبيف و السوسيز والخ لحوم غير صحية.
 
بالنسبة بقي للمعادن والفيتامينات، لإن الأطعمة الصحية بتحتوي عليهم فغالباً لو أكلت الأطعمة الصحية باعتدال حتاخد احتياجات جسمك منهم بدون الحاجة انك تعوضهم بكبسولات.
 
المهم دلوقتي تخيل انك معاك سلتين، حطيت في الأولي كل الكربوهيدرات، الدهون، اللحوم الصحية و التانية حطيت فيها كل الكارب، الدهن، اللحم الضار. 
خد بقي السلة الأولي دي علشان دي موضوع كلامنا.
 
السلة الأولي هي اللي لا يخلو منها أي نظام غذائي، بمعني لما أقولك نظام قليل الدهون عالي الكربوهيدرات كلامي بيبقي عن خيارات السلة الأولي. السلة التانية غير صالحة للاستهلاك الآدمي ( لو عايز تاكل أكل عالي الجودة) 
يعني حتاكل دهون من السلة الأولي، لحوم من السلة الأولي و كربوهيدرات من السلة الأولي. 
سواء عايز تخس، عايز تزيد أو تحافظ علي وزنك و شكلك.
 
طيب سليم فين المشكلة؟ 
هي مش مشكلة ولكنها اشكالية الصراحة و هي اختلاف نسبة العناصر الغذائية داخل الوجبة الواحدة، يعني ناكل قد ايه كربوهيدرات، دهون، بروتين. 
جسمي محتاج قد ايه صوديوم ولا قد ايه كالسيوم. 
الوجبة المثالية بالنسبة لأمريكا و طبعاً أغلب دول العالم بتحتوي علي 70% كربوهيدرات، 15 إلي 20% بروتين و الباقي حوالي 10% دهون. 
الحقيقة مفيش أي دراسة محترمة تقدر تقول ليه اختاروا الكربوهيدرات تبقي 70%، غالباً ده من أيام هوجة الخمسينات بتاعت علاقة الدهون بأمراض القلب. ( حبقي اتكلم عنها بعدين) 
المهم النسبة دي مع التجربة العملية كبيرة جداً وأدت لزيادة السمنة في العقود الأخيرة وكمان امراض القلب، حتي لو ال 70% بتوع الكربوهيدرات بتاخدهم من السلة الأولي.
 
حمية البحر المتوسط مثلاً بتحدد الكربوهيدرات فيها حوالي 50%، حمية رجل الكهف المعروفة بالباليو حوالي 30%، بتفضل النسبة تقل لحد ما توصل 5% في الكيتوجينك دايت و فيه دلوقتى زيرو كارب كمان سعادتك.
 
طب هل لو أنا علي دايت معين و أكلت من السلة التانية، حيبوظ الدايت؟
 
فهمتك يعني انت مثلاً علي الكيتوجينك و هبشت طبق سجق....... عادي؟ أو مثلاً كنت علي دايت قليلة الدهون و ضربت حتة جاتوه أو حتة كنافة و حسبتها في جملة السعرات الحرارية...... عادي؟ 
الحقيقة هو عادي مش حيبوظ الدايت، بس أنا شايف ان البهدلة والفرهدة في الالتزام بالدايت راجع لغرض أسمي انك تحافظ علي صحتك في المجمل يبقي أنت عملت زي اللي بيشرب سجاير لإنها بتقلل شهيته عن الأكل .
 
من الآخر، الأكل الصحي مفيد علشان تحمي نفسك من امراض سوء التغذية و قلة الفيتامينات والمعادن بينما كمية الأكل و نسبة مكوناته هي العامل المتحكم في نوع الدايت. 
متنساش حارب السمنة لانها لا تكف عن محاربتك 
#حاصر_جيناتك_لا_مفر 
في الصور نماذج للكربوهيدرات الضارة والمفيدة، الدهون الضارة و المفيدة و فيه صورة عن أمثلة للسلة الأولي. 
جايز ميكونش عندك رفاهية اختيارات من دي لإبعاد اقتصادية و ديموغرافية و لكن تأكد فيه بدائل كتيرة في كل بيئة لإن الطبيعة لا تنضب
التعليقات