صالح الغازي يكتب: حكايات رمضان (شعر)

 
تحويشة السنة م الكراسات
 
عمل المقص
 
من الورق حركات
 
قرطاس نشا
 
معجون ف حلة مية
 
أعمل كده ..ألزق
 
بالشكل ده.. تصدق!
 
عملت أجمل زواق!
 
ده جنب ده بالخيطان
 
شراشيب بترقص ع الحيطان
 
ولفة الخيط
 
عرفت التنطيط
 
من المنشر للمنشر
 
نفحات رمضان ما تتقدر!
 
بعد التعاون تراحم
 
والناس بتتزاحم لفعل الخير.
 
الشارع بقى مسقوف
 
قلوب ترفرف زي الطير
 
زي الحمام في الغيط
 
حاللو يا حاللو
 
على كل باب خلوا
 
فانوس كبير
 
العيال شايلة فانوس أصغر.
 
أنا قلبى كان
 
فانوس زمان
 
دلوقتى بقى
 
في قلب ولادي:
 
تحويشة العمر
 
من السنادي
 
للسنين الجاية
 
شمعة بتنور.
 
التعليقات