د.عادل البسيوني يكتب: من ذكريات الطفولة

 
انا وجدي
كان جدي رحمة الله راجل خمري اللون فاره الطول وفوق طولة كان يلبس الطربوش والجلباب وعلي الجلباب بالطو
وكان ذو هيبة... بالعربي كدا كان  هو المثال الحي ل سي السيد بتاع نجيب محفوظ كان بمجرد ان يحضر لزيارتنا الا وننطلق نحن صائحين جدي فار جه جدي جه وهو مش فار ولا قط ولكن اسمة عبد الغفار  رحمة الله عليه فا بالنسبه لنا هو جدي فار
بمجرد سي السيد... قصدي جدي مايدخل البيت.،علي الفور يقلع الطربوش ويضعه بجانبه وعلي الفور نتسلل خلسة ونلعب بالذر ..نجيبه مرة يمين ومرة شمال الي  ان ينخلع الذر من مكانة وننخلع نحن  يعني نختفي من البيت علي الفور 
عمرة ما زارنا الا وطار الذر طار واحنا طيران طيران بعد ما  الذر  ما طار
المهم سافرنا للبلد واحنا صغيرين وكنا عند وضع الطعام نجلس هس هس في انتظار الحاكم بامر الله سي السيد جدي الي ان بجلس ويسال الأولاد ما بياكلوش ليه؟ 
مستنينك يا سي السيد... قصدي ياجدي.. طبعا الكلام ده في في سري وكان هو الذي يقطع الظفر اي الفراخ والبط والمشمر والمحمر ويوزع علي كل واحد منابة واول ما يسمي نبتدي الأكل في جو  اسري نفتفدة هذة الأيام وكان بيشرب بطريقة ظريفة إلا  وهي طريقة القلة حيث يضع القلة من بعيد عن فمه  وتسمع المية و لها صوت وهو بيشرب
بعد الأكل يطلع الفراندا او التراس ويجلس ويا ولد هات الجريدة وانا اضحك في سري واقول الجرنال يا حاج.. عاملي  الكبير و ما بتعرفش ان اسمة جورنال  ولما كبرت عرفت  انه كان عارف اسمة صح  وان انا اللي كنت زي مانتم عارفين.بقي.
وفي يوم من الأيام ساعة العصاري كنت باللعب انا واخي ولقينا غراب ميت قام اخي شاله من جناحية بيدية الأثنين والغراب راسه مايله  زي عم باخ في فيلم اللنبي 
وجري اخويا جري علي جدي
جدي... جدي.. جدي غراب ميت حتي بص.. شوف.. ويدوب جدي مسك الغراب من جناحية بكلتا يديه  الاتنين... جناح يمين وجناح شمال 
واذ  فجأءة الغراب اللي كان ميت و عامل راسة مايله كدا هو زي عم باخ... نلاقي الغراب يصحي بقدرة قادر و الراس تتعدل ويقوم ينشن و ناقر جدي في قورتة.
هو نقر جدي من هنا واحنا يا فكيك  طيران من هنا و الغراب كمان طار بجد واحنا طيران وراه وهاتك يا ضحك. وبعد شوية قول شويتين قول تلات شويات روحنا واحنا وشنا باصص للأرض وماسكين نفسنا من الضحك بالعافية وجدي... قصدي سي السيد قاعد وقورته وارمه 
كل ما افتكر المنظر ده مقدرش امسك نفسي من الضحك
رحمك الله جدي العزيز كان طيب عكس ما الناس ما كانت  متخيله سي السيد
 
التعليقات