أحمد أسامة يكتب: يا رب جوز جناحات

 
يارب جوز جناحات
ومساحة فـ السماوات
أو روح لكائن مات
أصعد وما اتشَدِّش...
 
دي الأرض بتفتِّش
عن كل شيء بيطير
من أول العصافير
وخيالي فـ الأحلام
لبوادر التفسير...
 
يارب يوم من غير
الخبطة ما تدشّدِشّ!!
 
يارب يوم من غير
ما المس حاجات توجع
وحاجات بدون معنىٰ 
فـِ حاجات ما تتعدِّشّ...
 
يارب جوز جناحات
أو عِلّم بالإجابات
أو صبر ع المسافات
أو حيل مايتهَدِّشّ !!!! 
....................
يارب حلمي أعيش
أربع خمس تيّام
ما اشوفش فيهم حد
لا بجد ولا صورة
لا فـ شغل ولا شارع
ولا قهوة ولا جامع
ولا فيلم ولا كورة...
 
يارب نفسي أعيش
أربع خمس أحلام
مافيهمش جذب وشد
مافيهمش ناس بتموت
ولا صرخة من غير صوت
ولا افوت فـ شارع سد...
 
يارب شفت كتير
فَـ عيني مكسورة!!
 
يارب نفسي أكون
أعظم بطل كرتون
أو نسخة بالكربون
لرواية مشهورة
معلومة البدايات
والمتن والنهايات
وف كل مرّة الناس
تشوفها مبهورة...
 
يارب يجوا بكام
أربع خمس أصنام
وجزيرة مهجورة!!!!
 
*لمشاركتنا النصوص الإبداعية راسلونا على بريد إلكتروني: [email protected]
 
 
التعليقات