غربلة| سحر عبد القوي تكتب: مسلم وأفتخر.. ليه؟‎

 

اول ماعملنا أكونت الفيس بوك كنا بنختار خانة الديانة زي مامكتوبة ف البطاقة... وطبيعي لما حد يطلب الصداقة ندخل نشوف معلوماته فتقابلني الاكلشيه بتاع (مسلم وافتخر، مسيحي وافتخر، بلا ازرق وافتخر) الحقيقة انا مكنتش فاهمة ايه سبب الافتخار هنا بالظبط
الناس بتفتخر بهدف حققته... كتاب الفته... جايزة اجتهدت وتعبت عشان توصلها...
لكن بتفتخر بدينك ليه؟؟ ها ليه؟؟؟ انت عملته؟؟ طب انت اخترت الانتماء ليه؟؟ كنت موجود في وقت ظهور النبي بتاع الدين دة وانضميت ليه بمزاجك مثلا وشايف انك بذلت مجهود فكري عشان توصل لقناعة تتفق مع ماجاء به النبي وآمنت وبتفتخر؟؟ ...طب بذلت مجهود وآمنت... بتفتخر ليه برضو؟؟
انت اتولدت في البلد بتاعتك صدفة علي فكرة... فمش هاتفتخر انك مصري ولا بتنجاني... انت تحبها ماشي تعمل علي رفعتها عشان فيها مصلحتك ممكن... لكن انا ممكن اتفهم حد يفتخر انه تعب واتمرمط لحد ماعرف ياخد جنسية اجنبية فيقول انا كندي وافتخر انا امريكي وافتخر وهو منحدر من اصول مختلفة...
لكن تفتخر بحاجة انت ورثتها لا انت فكرت فيها ولا اللي ورثهالك فكر فيها ولا جد جد اللي ورثهالك فكر فيها دة اعتنقها تحت تهديد السلاح او لانه مش عارف يدفع الجزية او عشان يهرب من القمع اللي اصحاب الديانة مارسوه علي غيرهم (سوا المسيحيين لما مارسوه ع الوثنيين او المسلمين لما مارسوه علي ابناء الديانات الاخري)
كمان انت سعادتك ماقريتش ف كل الديانات الاخري اللي موجودة عشان تقرر انك علي الحق المبين وغيرك علي الباطل ( انت كمسلم تخاف تقرا الانجيل... وتخاف تقرا في الزرادشتية ولا المانوية ولا البوذية ولا اي ديانة تاني) اصلا بيجيلك فوبيا من اي حد بيتكلم في اللاهوت عموما وتاريخ الاديان وتطورها ويجيلك فوبيا كمان من الكلام العلمي المادي البحت وعندك شيوخ وقسس بيلووا دراع العلم عشان يثبتوا الاعجاز او يثبتوا ان في معجزات لسة بتتم والصور بتنقط زيت... وبتتحسس مسدسك لما حد يحكيلك التاريخ والسياق ويكشفلك اللي انت ماتعرفهوش
طيب بتفتخر بايه؟؟ ممكن تفهمنا يافندم ايه سبب الفخر بقا وجايب يقينك المطلق منين عشان نجيب زيك ونريح دماغنا؟

 

#غربلة مبادرة هدفها التشجيع على الكتابة في نقد ما يعتبره العقل الجمعي العربي قواعد ثابتة بينما تجاوزها الواقع والزمن والتطور من وجهة نظر الكاتبة أو الكاتب..
شكرا لكل من ساهمن وساهموا معنا في الغربلة.. ويمكن للمهتمات والمهتمين من كل الدنيا المشاركة بكتاباتهم وإرسالها مصحوبة بصورة شخصية على بريد إلكتروني: [email protected]

التعليقات