غربلة| نيفين سمير تكتب: سوفت-وير اليمين المتطرف

 
عارفين لما يبقى فيه برنامج كمبيوتر نازل بنُسخ مختلفه لبلاد مختلفه؟ قد تختلف اللغة وقد يختلف الشكل بعض الشئ.. لكن عموما يظل المضمون واحد. هو ده حال التطرف والعنصريه   بالظبط.  تلاقي كل المتطرفين بيقولوا نفس الكلام....  يمكن شكلهم يختلف واللغه اللي بيتكلموا بيها تختلف لكن هو نفس التخلف .. ودايما بينزل مع السوفتوير ده Feature اساسي ... البلاهه والجهل.
اكيد كلكم سمعتم عن مظاهرات العنصريين البيض و النازيين الجدد وامثالهم من المعاتيه في اميركا في الفترة الاخيره، وعن تصريحاتهم بخصوص المهاجرين والامريكان من اصل افريقي.  من ضمن ما قيل في الاعلام الاميركي والاسترالي خلال الايام الماضية من قِبل صحفيين معروفين بانتماءهم لليمين المحافظ، ان "الاستعباد ليس بالامرالغريب وكان معروف ومعمول به حتى وقت قريب ..  وانه الى يومنا هذا هناك بلاد اسلاميه لا زالت تتاجر في العبيد والبلاد الاسلاميه عموما كانوا من اواخر البلاد التي وقعت المعاهدات الدوليه لإلغاء العبوديه"  شوف ازاي يا اخي؟  نفس البلاهه والعته... 
ننتقل للنسخه العربيه من السوفتوير وتسأل احدهم عن زواج القاصرات مثلا، فيقول لك بكل ثقة " في اميركا واوروبا البنات بيكون لها علاقات في سن المراهقه"  وصل الامر الى درجة ان احدهم اقسم على وجود قانون اميركي يسمح بتزويج البنت في سن 12 سنة!! بدون مبالغة الرجل اقسم على ذلك في تعليقات على منشور يناقش مشروع قانون لخفض سن الزواج تقدم به برلماني مصري مؤخراً. الطريف ان لا اليمين المحافظ والعنصريين الاميركيين بيطيقوا المسلمين ولا الشرقيين عموما ... ولا المسلمين والشرقيين بيطيقوا الامريكان!! لكن سبحان الله زي ماتقولوا كده الدم بيحن وتلاقي الواحد فيهم لازم يحشر سيرة التاني في الكلام.
 
 فـ انت كرجل اميركي يميني مالك والمسلمين وتجارتهم في العبيد يا اخي؟؟ هو انت مش مفروض انك تعتبر نفسك مرتبة اعلى من البشر لكونك ذكر اوروبي ابيضاني اللون تنتمي للجنس الآري الارقى من باقي البشريه؟؟ و انت كمسلم شرقي من مجتمع محافظ ومتدين بالفطرة، مالك والامريكان فليزوجوا الاطفال  في بطون امهاتهم حتى.  الا تعتبر نفسك ابن خير امه وعندك دين الحق والمبادئ والرقي؟؟
 
 طبعاً ستجدوا ان السوفتوير موضوع حديثنا بيشتغل سياسه واحداث عامه.  يعني مثلا هاتلاقيه شغال عند الناس اللي تقرأ خبر تعذيب مواطن في قسم شرطه فيسارع ويقص عليك كم من المواطنين قتلهم افراد الشرطه في اميركا وكيف تعاملت الشرطه الفرنسية مع المتظاهرين بقسوة وهمجيه و يبرز لك قصاصات الاخبار والصور التي تؤيد ما يقول.  طب يا عم  مش دول بلاد وحشه بيتآمروا علينا واحنا احسن منهم بقى وكده؟؟  
 
هناك اصدار آخر يقترن دوما بسوفتوير العنصريه والتطرف: برنامج اسمه "متلازمه ستوكهولم"  يظهر من حيث لا تدري كما لو كان يقصد ان يصيبك بالاحباط وبأمراض الضغط والسكر والشيخوخة في آن واحد ...  هذا البرنامج خاص بالاقليات وهو المسئول عن الشلل اللي من نوعية تصريحات الكنيسه وكلام بعض الشخصيات القبطيه في الاعلام بعد الاحداث الطائفيه.  وده كمان طلع له نسخه اميركيه...
 
اه صدقوني زي مابقول لكم كده. اتنين سيدات اميركيات من اصل افريقي كتبوا في تويتر ان المتظاهرين العنصريين النازيين كان معاهم تصريح بالتظاهر و ان المظاهره المضاده اللي نظمها حقوقيين احتجاجا على العنصريه القبيحه دي هي اللي غلط لانهم احتكوا بالجماعه العنصريين!!! واضافوا "احناعايشين وواخدين حقوقنا ومفيش عنصريه في اميركا"،  على غرار "احنا طول عمرنا جيران وحبايب وبنبعت اكل لبعض ف الاعياد ومفيش طائفيه ف مصر".  اذكر هنا المقوله القائله Wonders never cease in this crazy world of ours my friends. زمن المعجزات لا ينتهي ابدا في عالمنا المجنون يا اصدقائي.  وختاما، الحق اقول لكم ان هذا الجهاز بأكمله اصابه العطب و لازم يتشرك وكفايه لحد كده والنبي.
 
 
غربلة مبادرة هدفها التشجيع على الكتابة في نقد ما يعتبره العقل الجمعي العربي قواعد ثابتة بينما تجاوزها الواقع والزمن والتطور من وجهة نظر الكاتبة أو الكاتب..
شكرا لكل من ساهمن وساهموا معنا في الغربلة.. ويمكن للمهتمات والمهتمين من كل الدنيا المشاركة بكتاباتهم وإرسالها مصحوبة بصورة شخصية على بريد إلكتروني: [email protected]
 

 

التعليقات